La femme sans pieds
Histoires longtemps à la Réunion, des cas qui peuvent encore exister.
Nous avons a la Réunion un imaginaire riche, ce genre d'histoire était bien réelle autrefois.
La femme sans pieds à la Réunion est un mythe ou une réalité? beaucoup d'hommes surtout ceux qui marchaient la nuit en quette de je ne sais quoi.
Fanm san piyé! Po so nafèr la sé listwar in boug té i ynm in bonpé fanm! (kèl zonm i iynm pa?) Sé in boug la zamé vréman tro travay dann son vi son pastan lété alé zwé kart sirtou lo swar rod in maniyèr giny in moné sanm larzan kart. Posa la zourné li té sar anmèrd bann bann madanm é loswar té son lot pastan!
Arla parla onzèr lo swar li sort son kaz si koté Laravine Blans Sin-Pir, li sava rozwinn lo lotr dalon, pars dann kart si ouvé zwé ginyé la plipar lotan i fo awar in dalon lo zé. So dalon la i zwé raman li lé la po signal par kod lo zé bann boug i sava èt plimé.
Lo boug lé kontan li mazine pa kosa i sava ariv ali. Stan la dann lakomine la limiyèr piblik té étinn 10 èr lo swar po ro alimé landmin matin 5 èr. Donk li sort koté stad kayinn dann fénwar li désann ziska dèrniyé bout la krwazé li sa rozwinn son dalon, lo boug la pa pèr li la abitiyé mars la nwit. Li mars san problinm zika lo kwazé arivé li prann la monté, é la 15 mèt pli lwin, li wa dann fénwar inn zinn fanm biyn klèr dobout dann fénwar konm po atann in moune.
San toupé lo boug i abord lo fanm, dann son léspri sé in fanm lé antrinn rod in nafèr, sé in fanm kaniar, donk sé in bon nafèr, kart li wa war apré. Li kas dé blag sanm lo fanm i réponn pa li, rod in blag po di po fé koz lo fanm oki! konm i réponn pa ali, li sèy fé in dèrniyé zès propoz lo madanm alé fé in tour sanm li, son kamarad wa war apré.
Minm an propozan, lo fanm i koz pa na sinpléman inn ti kèrlté la line, li li di viyn aou si sou vé arla li komans désann in ti bout lo fanm i avans vèr li, dann son kèr li di lo nafèr lébon li sar pas in bon moman. Zot i désann 20 mèt pli ba, in fanm tousèl dann la nwit sé konm in fanm fasil, li rod po kos kos akoté mé toudinkou li sèy tous tous inpé lo min lo tantine mé li ariv pa a trouvé, li ésèy minm anfons son min minn sé konm in vid konm li lé antrinn poz son min dann in zanr kourandèr sé la li apèrswa ké anfinnkont lo fanm na pwin ditou lo pyé èl i flot dann lé zèr.
Kann li la rann ali kont ké lété pa sanm in moune vivan lé té antrinn kozé, Li la bèz in kouri dopi la krwzé Laravine Blans ziska koté stad la Kayinn. Si té falé giny in méday krwa mwin li noré été promiyé, pli dé mwa li la pi sorti po alé zwé kart lo swar. Ziska zordi zour lo boug i mars pi tousèl la nwit.
